Pasyon

Ni: Noel Sales Barcelona

nagninilaynilay kami

sa Iyong paghihirap

sapagkat nasa dulo ito

ng aming mga daliri

at nakaukit sa aming kalamnan

inaalala namin ang Landas ng Kapait-paitan

dahil nalalasahan namin sa sariling bibig

ang pait at pakla ng aming buhay

na lalo pang pinaaasim ng mga katotohanan

na taguri sa amin, mga latak ng lipunan

nakatatak sa aming noo

hindi ang bakas ng Koronang Tinik

na sumugat sa kasantu-santusan mong Ulo

kundi ang malalalim na gatlang tanda

ng aming hirap at dusa

sa aming balikat, hindi Krus na kahoy

ang pasanpasa't sumusugat

kundi ang pingga ng dalitang pasan araw-araw

dahil kami'y patuloy na pinagdaramutan

ng puri, pagkakataon at marangan na buhay

pinaglilibakan kaming tulad Mo

dinudusta at inaaglahi ng makabagong Romano

sapagkat kami ay hindi mga tao

kundi mga kalakal, mga muraong panindang

madaling makuha't maabuso

sa aming mga paa at pulso ang nakabaon,

hindi pakong ipinagdalita Masakit

kundi ang inhustisya't kawalang tangkilik

niyaong dapat sa amin ay magbait dahil sa dugo't pawis

sa dugo't pawis naming anakpawis ang kayamanang kimkim

ang kamatayan namin ay katulad ng Iyo

namamatay kaming nakahubo dahil wala ni singko

ipinagsasapalaran ang buhay naming pesante't obrero

niyaong mga duke at sundalo, mga hari't prinsesa,

anong saklap ang mabuhay at mamatay sa bayang Inaba!

sa oras ng aming libing ni walang tanglaw

kagaya rin ng ikaw ay kunin ng iyong Ina't ni Hosep ng Arimatea

na lihim mong Apostol simula pa noong una

at ibaon ka sa isang libingang inukit lamang sa bato

sa di malamang halamanan sa paanan ng Bundok ng Bungo

inilihim niya ang pagkakaugnay niya sa Iyo

dahil takot siya para sa sariling buhay

katulad din niyaong mga kababayang

lihim na nagmamahal sa kapwa niya't bayan

subalit sa patago ang gawain: aayaw mabulgar

inaalala namin, o Poon ang paghihirap mo

ang kadusta-dustang kamatayan mo

dahil Kayo ay kami, at kami ay Kayo

na araw-araw, hinuhubdan ng dangal

at iniriripang katulad ng magnanakaw

gayunman, sa pag-alaala namin

sa Iyong kamatayan ay may napagtanto kami

isang hiwagang inilihim mo sa nagdudunung-dunungan

gaya nang sinambit ng Ina mong Tunay:

darating ang araw, palalo ay papanaw

palalayasin ang mayayamang nagdamot

sa mga katauhang sa lipunan ay limot

at sa Ikaw mismo ang hahatol, hahatol

sa mga buhong, palalo at balakyot

at Iyong ibubuhos sa kanila ang Iyong Poot!

at sasabihin ng madla

sa mga oras ng pagdatal

ng mga tagapaghukom:

sa aba nga ninyo! sa aba nga ninyo

kayong mapagpaimbabaw!