Panambitan sa Cristo

ni Noel Sales Barcelona

mula pa noon

kabutihan at pagibig sa Diyos at kapwa

ang laman ng mga Aral mo.

walang halong pag-iimbot

sinalang mo't pinagaling

ang mga kapansanan ng tao:

bulag nakakita

bingi nakarinig

pilay nakalakad

pinagsalita mo ang mga pipi

tinuyo ang sugat ng mga ketongin

pinalaya ang inalihan ng mga demonyo

pinatawad mo ang mga sala ng tao

itinuro ang pagpapakababa

at hindi pagpapakarahuyo sa yaman ng mundo.

datapwa't higit pa sa sugat

at kapansanan ang pinagaling 

ng Iyong mapaghimalang mga kamay

ginamot mo rin ang sugat

na nagnanaknak ng lipunang 

iyong ginagalawan:

ibinunyag ang nagbabanal-banalan

giniba ang tore ng kasinungalingan

inihantad ang mga kawata't magnanakaw

kung kaya nga, sa galit nila

nilang nasa estado poder:

inakusahan ka nilang mamumusong, kriminal!

kahit pa walang nakitang sakdal laban sa Iyo

sina Herodes at Poncio Pilato

hiniling nila ang Iyong ulo, hiniling nila ang Iyong ulo.

ngayon marami kang katulad, Poon ko

marami kang gumagawa ng kabutihan

subalit sila ang ginigipit at pinarurusahan.

katulad Mo rin silang sa halip na putungan

ng korona ng mga papuri't parangal, 

koronang tinik at sampal ang handog ng sukaban.

hinahagupit din sila nang paulit-ulit ng suplina:

suplina ng pasismo at latigo ng kahirapan

tambo ng kalupitan at yantok ng kadustaan.

ipinapako sila - hindi sa punongkahoy

kundi sa kadusta-dustang kalagayan:

kamangmangan, karalitaan, kadayukdukan!

ibinibilad din sila sa kahihiyan

hinuhubdan ng pangalan at karangalan

ibinebenta at ipinagsasapalaran.

sinisibat din sila sa kanilang mga tagiliran

dahil laging katabi nila ang lungkot ng buhay

ang kawalang pag-asa't kabusabusan.

ay, walang katapusang ay!

walang katapusang kawing ng gibik

at pagdagok sa dibdib.

kailan kaya susuklian ng pagibig ang pagibig?

kailan gagantihin ng kabutihan ang kabutihan?

kailan kaya darating ang aming kaligtasan?

Maranatha! halika Panginoon ng mga Hukbo

Haring mabait na maylikha ng sansinukob:

sa aming paglililong, magbangon sa Iyo ang poot:

iunat mo ang Iyong kamay na may hawak na sundang

Maranatha! magsimula nawa ang Iyong Armageddon!

Maranatha! halina't lupigin ang lahi ng mga alakdan at ulupong!

habag mo'y ilapit, Poong mabait

sa aming bayan mong mat'wid

haplusin mo't tuyuin itong luhang mapait.

Maranatha, halina! 

Sa kapangyarihan Mo'y

lupa'y baguhin na!

Martes Santo (Marso 30, 2010)

Lungsod ng Antipolo