Sa Palengke ng mga Gahaman

By: Rom Factolerin

binigkas sa conspiracy bar para sa poetry reading ng Maguindanao Massacre 

Sa palengke ng mga gahaman

Tatlo singko na lang ang buhay ng tao

At kung minamalas ka minsan, tatawaran ka pa.

Walang kwenta kahit abogado ka man o mamamahayag pa,

Lalo na kung karaniwang tao ka pa.

Tatlo singko na lamang ang buhay ng mga Pilipino,

Mas mura kaysa sa kending inilalako sa kanto

Sa mga hiningang nakabitin sa dulo

Ng kalabit at nguso ng mga palalo,

Higit pa sa wisyo ng mga panginoong

Makati ang daliri sa gatilyo.

Tatlo singko na lamang ang buhay ng tao

Kaya’t sa limampu’t-pitong buhay na pinakyaw

Ibinenta at walang-awang kinatay

Ng mga burukratang mapagtungayaw

Sa mata ng buong bayang naghuhumiyaw

Katarungan at kalayaan

Laban sa mapang-aping lipunan.

Tatlo singko na lamang ang buhay ng mga Pilipino,

At ang panawagan sa mundo

Halina’t magsilbi kayo

Pakyawin ninyo habang sariwa pa

Ang mga lamang nagkalat sa lupa

Mga dugong nakakulapol sa mukha

Ng bayang sagad-sagad sa dusa at luha.

Pagkat…

Darating din ang araw

Na ang mga baryang ito ay maiipon,

Mga baryang tinumbasan ng buhay

Na siyang magsisilbing suhay

Mga baryang tutunawin sa init ng luha at galit

Ng pinaghalong dugo at pawis.

Huhubugin mula sa pinagmulang lupa at luha

Ng mga naulila

Dito isisilang ang isang uri ng bala

Balang sasalubong sa sumisibol na umaga.

Isa-isang ipuputok ang mga baril

Na naglalaman ng mga balang ito

Duduro sa sentido ng mga mapang-abuso

At dudurog sa kanilang maiitim na puso

Ibububo nito ang dugo ng mga palalo

Bilang kabayaran sa kanilang kabuhungan.