Mailap na Pangarap
ni: Shielah T. Ilagan
Paano ko ba sasabihing mahal kita?
Hindi mo naman ito madarama
Kay layo mo na
Kayhirap abutin
Isang pangarap na mananatiling pangarap
Isang panaginip na kailan man
Ay di magaganap
Marahil ako’y isang tanga
Nangangarap maangkin ka
Ah bakit nga ba, hinahangad ka?
Sa sulok ng aking puso
Inaasam -asam
Sana’y maambunan kahit tingin man lang
Isang matamis na ngiting para sa akin lang
Sana’y masulyapan
Kahit minsan lang
Ngunit itong mundo nati’y magkalayo
Ako’y nasa Silangan,ika’y nasa Kanluran
Isang kahangalan ang aking pag-asam
Masuklian ang aking nararamdaman
Isa kang mailap na pangarap
Walang katiyakang matutupad
Ngunit ako’y nagpapasalamat
Ika’y nakilala’t minsa’y nakausap
Marahil ay hindi mo nauunawaan
Bakit itong damdamin
Ay para sa ‘yo lamang
Akala mo siguro nagbibiro ako
Nang minsan sabihin ko
“Ika’y aking gusto….”
Marahil ay hindi na dapat maghangad
Ng lalabis pa sa isang pangarap
Dapat na ikasiya
Minsan ay nadama
Napukaw na damdamin
Iyong napaligaya
Ngunit sana lang
Kahit sa pangarap lang
Minsa’y sumagi ako sa iyong isipan
Sana man lang iyong naramdaman
Itong katangahang hindi ko mapigilan…
1 comments:
b-U-t-FULLLLLLL
kaibigang Marivic
Post a Comment